БОЛАШАҚ МАМАНДАРДЫ ДАМЫТУҒА ҚОСЫЛҒАН ҮЛЕС: Қ.И. СӘТБАЕВ АТЫНДАҒЫ УНИВЕРСИТЕТТЕ АУДИТОРИЯНЫҢ БЕЗЕНДІРІЛУІ

2024 жылдың бірінші тоқсанында «Borusan Cat Қазақстан» компаниясының оқыту және дамыту бөлімінің алдына Алматы қаласында орналасқан еліміздегі ең ірі техникалық жоғары оқу орындарының бірі – Қ.И. Сәтбаев атындағы Қазақ ұлттық техникалық зерттеу университетінің мерейтойына дайындыққа қатысу міндеті қойылды.  

Бұл тарихы бай университет тау-кен өнеркәсібі мамандарын даярлауға маманданған білім ордасы және оның білім беру бағыты компания қызметінің бейініне сәйкес келеді. Borusan Cat Қазақстан бас директоры мен университет басшылығы арасындағы уағдаластық шеңберінде компанияға оқу аудиторияларының бірін компания стилінде безендіруге мүмкіндік берілді. 

Borusan Cat Қазақстан командасы университетке барды, онда оған таңдау үшін бірнеше орынжай ұсынылды. Мұқият қарап-тексеруден кейін мамандар толық қайта құруды қажет ететін ең қолайлы аудиторияны таңдап алды. 1980 жылдары салынған орынжай едендерді жөндеуді, терезелерді ауыстыруды, қабырғаларды гипсокартонмен әрлеуді және заманауи интерьер элементтерін орнатуды қамтитын күрделі жаңартуға мұқтаж еді. 

Бастапқыда білім алушылар үшін ыңғайлы үстелдерді және жиналыстар өткізуге арналған орындықтар орнатуды көздейтін жоба әзірленді. Жоба бекітілгеннен кейін жөндеу жұмыстары басталды: жаңа электр сымдарын тарту, еден төсеу, заманауи терезелер орнату және барлық әрлеу элементтерін жаңарту. Жұмыстар қарқынды түрде жүрізіліп, екінші тоқсанға таяу жөндеу жұмыстары сәтті аяқталды. 

Құрылыс жұмыстары аяқталғаннан кейін аудитория заманауи оқу техникасымен жабдықталды. Корпоративтік білім беруді қолдау шеңберінде Borusan Cat Қазақстан университетке компьютерді, принтерді және сенсорлық функциялары бар интерактивті тақтаны қамтитын жабдықтар жиынтығын тегін ұсынды. Аталмыш тақта операциялық жүйемен және электрондық қарындаштар мен таяқшалар секілді арнайы интерактивті құралдармен жабдықталған. Мұндай құралдар оқытушылар мен студенттерге нақты уақыт режимінде контентпен өзара әрекеттесуге: сурет салуға, құжаттарды жүктеуге, интернетті пайдалануға және бүкіл аудиторияға материалдарды көрсетуге мүмкіндік береді. 

Техникалық жарақтандыруды аяқтағаннан кейін компания аудиторияны және оған іргелес дәлізді корпоративтік стильдегі плакаттармен безендірді. Плакаттарда тиеуіштер, бульдозерлер, грейдерлер және басқа да жоғары технологиялық машиналар секілді тау-кен өндіру саласына арналған «Borusan Cat Қазақстан» компаниясы ұсынатын инновациялық шешімдер мен техникалар бейнеленген. 

Университет басшылығы жобаны іске асырудың барлық кезеңдерінде компания өкілдерін жылы қарсы алып, ал жоба аяқталғаннан кейін аудиторияны мерейтойға орай дайындауға қосқан үлесі үшін ресми алғысын білдірді. Сондай-ақ «Borusan Cat Қазақстан» компаниясы аталмыш оқиғаның құрметіне университеттің ақпараттық материалдарында аталып өтетіні мәлімделді. 

Сонымен бірге университет компанияға жеке білім беру іс-шараларын өткізу және Тапсырыс берушілерді оқыту үшін жаңартылған аудиторияны пайдалануды ұсынды. Бұл жайт академиялық қауымдастық пен бизнес арасындағы ынтымақтастықтың маңыздылығы мен жемістілігін баса көрсетеді. 

Осылайша Borusan Cat Қазақстан университеттің инфрақұрылымын дамытуға үлес қосып қана қоймай, сонымен қатар тау-кен саласы мамандарының болашақ буынын білім алу үшін заманауи жағдайлармен қамтамасыз ете отырып, оқу орнымен әріптестік байланысын нығайта түсті.